श्रीमद्भगवद्गीता हा ग्रंथ माणसाला लाभलेली एक दुर्मिळ अशी भेट आहे. हा ग्रंथ भारतीयांसाठी परिचित असला तरीही अनेकांना तो अपरिचित आहे. गीतेचे आचरण कठीण असले तरी सगळ्यांना गीता जाणून घेणे शक्य आहे. गीतेमधील अनेक श्लोक परस्परांशी जोडलेले आहेत. या सर्व श्लोकांचे ओवीरूप सटीक विवरण लेखक आणि अभ्यासक आर. जी. पाटील यांनी ‘ओवीरूप श्रीमद्भगवद्गीता’ या ग्रंथात केलेला आहे. मराठी भाषेतील श्लोकांचे हे ओवीरूप समजायला आणि पाठांतरास सोपे आहे. या ओवीरूपात चारही चरणांचा अर्थ क्रमाने दिलेला आहे. काही ठिकाणी एकेक चरण तर काही ठिकाणी एकापेक्षा अधिक चरण एकत्रित घेऊन अर्थ स्पष्ट केलेला आहे. हे ओवीरूप आशयसंपन्न असून हा आशय शक्य तितक्या मोजक्या शब्दात देण्याचा प्रयत्न लेखक आर. जी. पाटील यांनी प्रस्तुत ग्रंथात केला आहे.