स्त्रियांनी स्वतःचे शरीर, मन, नातेसंबंध आणि समाज यांबाबत अंतर्मुख व सजग होऊन चांगले, मानवी जीवन जगण्यासाठी प्रयत्नशील व्हावे, या ध्यासाने ऋता पंडित यांनी एका नामांकित वृत्तपत्रामध्ये लेखमाला लिहिली होती. लिंगभावामुळे घरात, घराबाहेर, नोकरीव्यवसायाच्या ठिकाणी उद्भवणाऱ्या लिंगभेदांवर साध्यासोप्या शब्दांत, संवादी स्वरूपात केलेले भाष्य वाचकांना ‘स्वभान ते समाजभान’ यांबाबत नवा प्रगल्भ दृष्टिकोन देते. स्त्रीला स्वतःचे शरीर, मन, इच्छाआकांक्षा यांबद्दल जागरूक करण्यासाठी व तिला आपले अवकाश मिळवण्यासाठी हे पुस्तक नक्की मदत करेल. स्त्रीच्या दैनंदिन जीवनातील घडामोडी, बरेवाईट अनुभव, राष्ट्रीय व आंतरराष्ट्रीय पातळीवरील दाखले प्रस्तुत करून लेखिकेने वाचकांशी भावनिक जवळीक साधली आहे. एरवी समाजात निषिद्ध मानले जाणारे बॉडीशेमिंग, मासिक पाळी, शृंगार व लैंगिकतेशी संबंधित अनेक बाबींवर प्रांजळ मतं मांडून लेखिकेने त्या विषयांना वाचा फोडली आहे. समतेची ही लढाई ‘पुरुष विरुद्ध स्त्री’ अशी नसून ती पुरुषप्रधान, पुरुषी वर्चस्वाविरुद्धची लढाई आहे. या लढाईत सुजाण, सजग, आत्मभान आलेल्या स्त्रियांसोबत संवेदनशील, समजूतदार पुरुषांचीही भूमिका महत्त्वाची मानत लेखिकेने त्याचा पुरस्कार लेखांद्वारे केला आहे, हे मला या पुस्तकाचे एक बलस्थान वाटते. हरीश सदानी, सामाजिक कार्यकर्ता