‘समाजशास्त्र’ (Sociology) हे नव्याने उदयास आलेले ‘शास्त्र’ (Science) होय. या शास्त्राच्या विकासाकरिता अनेकानी केलेले कार्य खूप मोलाचे आहे. या संदर्भात विदेशातील संशोधक व शास्त्रज्ञानी केलेल्या कार्याप्रमाणे भारतीय विचारवंत व शास्त्रज्ञानी केलेले कार्यही उच्च दर्जाचे आहे. विद्यापीठ अनुदान आयोगाने मान्य केलेल्या देशभरातील अनेक विचारवंतांचा समावेश विद्यापीठांच्या अभ्यासक्रमात केला आहे. त्या सर्व विचारवंतांचे योगदान महत्त्वपूर्ण आहे. समाजव्यवस्थेची उन्नती व विकास करण्यासाठी त्यांचे विचार वस्तुनिष्ठ व वैज्ञानिक दृष्टया उपयोगी सिद्ध झालेले आहे. त्या महान भारतीय विचारवंतांचा वैचारिक वारसा समाज उन्नती व विकासाकरिता जतन करून ठेवणे अत्यंत आवश्यक आहे. हाच वारसा समाजशास्त्रीय दृष्टिकोनातून वस्तुनिष्ठ व वैज्ञानिक पद्धतीने मांडण्याचे काम सदर पुस्तकात लेखकांनी केले आहे.
देशातील अनेक विचारवंत, अभ्यासक, संशोधक व शास्त्राज्ञांनी सामाजिक, आर्थिक, राजकीय, धार्मिक अशा सर्वच क्षेत्रात आपल्या कार्य कर्तृत्वाचा ठसा उमटविला आहे. त्यामध्ये महात्मा गांधी (१८६९-१९४८), डॉ. बी. आर. आंबेडकर (१८९१-१९५६), डॉ. एस. व्ही. केतकर (१८८४-१९३७), राधाकमल मुखर्जी (१८८९-१९६८), डॉ. एम. एन. राय (१८८७ -१९५४), डॉ. जी. एस. घुर्ये (१८९३-१९८३), डॉ. एम. एन. श्रीनिवास (१८९६-१९९९), डॉ. ए. आर. देसाई (१९१५-१९९४), डॉ. एस. सी. दुबे (१९२२-१९९६) अशा आघाडीच्या एकूण नऊ भारतीय विचारवंताचा व शास्त्रज्ञाचा समावेश सदर पुस्तकात केलेला आहे.
या ग्रंथातील समाविष्ट विचारवंतांचे मौलिक विचार मांडताना त्यांनी व्यक्त केलेली मते, विचार, संज्ञा, संकल्पना व सिद्धांत महत्त्वाचे ठरतात. त्यांचे विचार, मते, दृष्टिकोन व त्यांचे सिद्धांत अगदी सोप्या व सरळ भाषेत मांडण्याचा प्रयत्न येथे करण्यात आला आहे. समाजशास्त्र विषयाचे प्राध्यापक, संशोधक व विद्यार्थ्यांना हे पुस्तक नक्कीच उपयुक्त ठरेल असा आम्हाला विश्वास वाटतो.