ज्यांचा प्रभाव दीर्घकाळ आणि सर्वदूर पसरला अशा विसाव्या शतकामधल्या साहित्यिकांमध्ये फ्रान्झ काफ्का या ऑस्ट्रियन जर्मन लेखकाचे स्थान निर्विवादपणे वरचे आहे. त्याचे आयुष्य जेमतेम ४१ वर्षांचे आणि त्याच्यामधल्या लेखकाचे आयुष्य १५/१६ वर्षांचे असूनही काफ्काचे लेखन नंतरच्या सर्व पिढ्यांवर परिणाम करत राहिले कारण मानवी आयुष्याच्या अनाकलनीय अर्थशून्यतेचा त्याने घेतलेला वेध अत्यंत भेदक आणि तितकाच तटस्थही होता.

अशा काफ्काचा परिचय मराठी लेखक वाचकांना करून देणारा हा आस्वादक संदर्भग्रंथ आहे. काफ्काचे अल्पचरित्र, चरित्रपट, त्याची ‘द ट्रायल’ ही कादंबरी, काही टिपणे हे सगळे मराठीत उपलब्ध करून देतानाच काफ्काच्या काळचा प्राग ( प्राहा) या शहराचा नकाशा, काफ्का परिवाराचा वंशवृक्ष आणि काफ्काशी जोडणारी छायाचित्रे, त्याने स्वतः केलेली रेखाटणे यांमधून काफ्का आणि त्याचा आसमंत वाचकांसमोर उभा राहतो.